Literature

مرے خلوص کی گہرائی سے نہیں ملتے
یہ جھوٹے لوگ ہیں سچائی سے نہیں ملتے

وہ سب سے ملتے ہوئے ہم سے ملنے آتا ہے
ہم اس طرح کسی ہرجائی سے نہیں ملتے

پُرانے زخم ہیں کافی ، شمار کرنے کو
سو، اب کِسی بھی شناسائی سے نہیں ملتے

ہیں ساتھ ساتھ مگر فرق ہے مزاجوں کا
مرے قدم مری پرچھائی سے نہیں ملتے

محبتوں کا سبق دے رہے ہیں دُنیا کو
جو عید اپنے سگے بھائی سے نہیں ملتے

راحت اندوری

کیا دلِ مجروح پہ سختی اور جاری رکھنی ہے
ناخوشی سے آشنا کیا عُمر ساری رکھنی ہے

​سحر سے لے کر غروبِ شمس تک رہنا ہے چُور
کیا مسلسل آپ نے یہ شب بیداری رکھنی ہے

​اُن کا کرنا اَپنے سَر لے کر ٹھہرنا جُرم وَار
کیا کریں، وعدہ کِیا تھا، پَاسداری رکھنی ہے

​اِس دفعہ یہ سوچ ہی ہم نے لیا ہے جو بھی ہو
آزمانے اور ستانے میں باری رکھنی ہے

​وہ کیفیت جس سے جائے نہ خیالِ دلرُبا
اپنے اُوپر وہ ہی بس ہر وقت طاری رکھنی ہے

​وقت ہے آصفؔ! جو چاہو کر ہی لو اَب فیصلہ
سنوارنی ہے آخرت یا دُنیاداری رکھنی ہے

☆☆☆☆☆☆☆☆☆☆☆

محمد آصفؔ سلیم

محبتوں میں مسخر تو خیر کیا کرتے
یہی تھا شرف، سلیقے سے ہارتے دل کو

دریدہ جاں پہ کوئی اب نہیں تھا خندہ رو
وگرنہ شوق سے ہم بھی سنوارتے دل کو

تم سے میرا کلام مشکل ھے ،
بس یہی ایک کام مشکل ہے

کیسے مانوں کسی کی ھستی کو ۔
اپنا کھودوں مقام مشکل ھے .

یہ ملے اور وہ بھی مل جائے ،،
خواھشوں کا تمام مشکل ھے ،

پیرومرشد ھوا ھے نفس مرا،،
شخص کا احترام مشکل ھے

اپنے بندوں کے یار دفتر میں ،،
وہ لکھے میرا نام مشکل ھے

اپنی میں کو اگر نہیں مارا،،
حوض کوثر کا جام مُشکل ھے،

شاعر ۔ افتخار افی

بہت ہی دور ٹھہری میں بہت ہی دور تم بھی ہو
ادھر مجبور میں بھی ہوں ادھر مجبور تم بھی ہو

تمہارے دوستوں میں تذکرہ رہتا ہے گر میرا
مری سکھیوں میں جانم ان دنوں مشہور تم بھی ہو

مسلسل درد کے سائے ہیں دونوں کے تعاقب میں
اِدھر بیزار ہوں میں بھی ادھر رنجور تم بھی ہو

ہمیں مٹنے کا کوئی غم نہیں بس یہ شکایت ہے
ہمارے دشمنوں کی ہی طرح مسرور تم بھی ہو

خموشی ہے لبوں پر اور زلفیں بکھری بکھری ہیں
یوں لگتا ہے کسی کی زلف میں محصور تم بھی ہو

تمہارے دم سے روشن ہے مری راتوں کی تنہائی
تصور میں رخِ مہتاب سے پر نور تم بھی ہو

وہی نظریں بچا کر چل رہے ہیں اے سحر مجھ سے
کبھی کہتےتھے جو مجھ سےکہ مثلِ حور تم بھی ہو