چاروں طرف یہ کس نے نافے لٹا دئیے ہیں
ہوش اہلِ گلستاں کے کس نے اڑا دئیے ہیں
قصّے غمِ جہاں کے کس نے بُھلا دئیے ہیں

اُن کی مہک نے دل کے غنچے کھلا دیئے ہیں
جس راہ چل دئیے ہیں کوچے بسا دیئے ہیں

شاہد ہیں ہر کسی کی حالت پہ اُن کی آنکھیں
رہتی ہیں سائلوں کی حاجت پہ اُن کی آنکھیں
ہیں مہربان کتنی اُمّت پہ اُن کی آنکھیں

جب آگئی ہیں جوشِ رحمت پہ اُن کی آنکھیں
جلتے بجھا دئیے ہیں روتے ہنسا دئیے ہیں

مشہورِ گرمِ فتنہ بازار اِس کا کتنا
جنسِ گناہ کا ہے اَنبار اِس کا کتنا
ہر زخم حد سے گہرا ہر بار اِس کا کتنا

اِک دل ہمارا کیا ہے آزار اِس کا کتنا
تو نے تو چلتے پھرتے مردے جلا دئیے ہیں

خیرکثیر اُن کے جب دستِ گنج میں ہو
پھر یاس و بے یقینی کیوں مدح سنج میں ہو
بیمار مصطفیٰ ہو اور ششّ و پنج میں ہو ؟

اُن کے نثار کوئی کیسے ہی رنج میں ہو
جب یاد آگئے ہیں سب غم بھلا دئیے ہیں

وہ فخر فرشیوں کے وہ ناز عرشیوں کے
خاتم نبوّتوں کے ، رہبر وہ اُمّیوں کے
مظہر جمالِ حق کے ساقی وہ مستیوں کے

اِسرا میں گزرے جس دم ، بیڑے پہ قدسیوں کے
ہونے لگی سلامی پرچم جھکا دئیے ہیں

بھیجا گیا نہ یونہی ہم کو تمہاری جانب
جرموں کو لا رہے ہیں رو رو تمہاری جانب
خلقِ خدا گری ہے ، یہ لو تمہاری جانب

آنے دو یا ڈبو دو اب تو تمہاری جانب
کشتی تمہی پہ چھوڑی لنگر اُٹھا دیئے ہیں

دنیا میں کوئی تیری ایسا بھی فرد ہو گا ؟
اُمّت کے واسطے جو تصویرِ درد ہو گا
جس کی فغاں سے چہرہ آتش کا زرد ہوگا

اللہ کیا جہنم اب بھی نہ سرد ہو گا ؟
رو رو کے مصطفےٰ نے دریا بہا دئیے ہیں

اَرض و سما کی حد کا رقبہ کسی نے مانگا
لوح و قلم کا اُن سے قبضہ کسی نے مانگا
اِس کائناتِ کن پر غلبہ کسی نے مانگا

میرے کریم سے گر قطرہ کسی نے مانگا
دریا بہا دئیے ہیں دُر بے بہا دئیے ہیں

تاجِ علومِ رازیٓ تم کو رضآ مسلم
جذبِ دلِ غزالی تم کو رضآ مسلم
اُمّت کی سربراہی تم کو رضآ مسلم

ملکِ سخن کی شاہی تم کو رضآ مسلم
جس سمت آگئے ہو سکے بٹھا دئیے ہیں

مدحِ شہِ عرب میں گویا ہیں کتنے عالم
لہرا رہا ہے کس کی فکرِ رسا کا پرچم
رازیٓ نے جو کہا ہے کہتے ہیں آج وہ ہم

ملکِ سخن کی شاہی تم کو رضآ مسلم
جس سمت آگئے ہو سکے بٹھا دئیے ہیں

#madinah #masjidnabawi #today #haram #muhammadadilattari