تجھے کیوں غیر کے پہلو میں رہ کر ڈر نہیں لگتا
مجھے تیرے لیے خود سے کوئی بہتر نہیں لگتا

ہے اچھا سرد موسم میں کسی کا ہجر بھی لیکن
کفن جتنا کشادہ ہو کبھی چادر نہیں لگتا

ترے کہنے پہ گہنے لے تو آیا ہوں ترے لیکن
مِرے مذہب میں ایسے حُسن پر زیور نہیں لگتا

کوئی داو نہیں جو آزمایا ہی نہ ہو اُس نے
وہ دھوکہ گھونپ جاتا ہے اگر خنجر نہیں لگتا

سبھی سے دُشمنی پالونگا میں اُس کی محبت میں
سنا ہے اُس کے پہلو میں کسی کا ڈر نہیں لگتا

محبت کا نہ ہونا بد نصیبی کی علامت ہے
مگر اچھا وہی ہے جس کو یہ پتھر نہیں لگتا

کل اک تصویر میں دیکھا تو آنسو آ گئے امجد
تِرا شوہر کہیں سے بھی تِرا شوہر نہیں لگتا

محمد امجد