مری چشمِ تَر میں نہ رہ سکے مری آبجُو سے اتر گئے
کئی لوگ تھے جنہیں آخری دفَعہ رو لیا سو وه مر گئے

کسی آنجہانی کی یاد ہوں جو پڑی ہے بَكس میں تِہ بہ تِہ
میں لباسِ کُہنہ و خام ہوں مجھے رکھنے والے گزر گئے

جو اُچھالتے نہ تھے خامیاں وه جو لوگ تھے مرا آئینہ
مرے مُخلِصین کو کیا ہوا مرے رُو شناس کدھر گئے

ہوئی شب تو خُنکی بھی بڑھ گئی سو ترے خطوط جلا لیے
ابھی راکھ پوری بنی نہ تھی کہ ہوا میں ذرّے بکھر گئے

تمثیل چوھدری