ہماری دوستی کو رائیگانی کی ضرورت ہے
بچھڑ جانا ہی اب شائد کہانی کی ضرورت ہے

تمہاری آنکھ جو سیراب کر سکتی ہے راتوں کو
عجب دریا ہے جس کو خود بھی پانی کی ضرورت ہے

اگر یہ مستقل رک جائے گی تو کیا کرو گے تم
میاں یہ سانس ہے اس کو روانی کی ضرورت ہے

چلو تسلیم کرتے ہیں محبت لفظ ہےلیکن
تمھارے لفظ کو تازہ معانی کی ضرورت ہے

کہیں تو نوجواں سوچوں پہ بھی طاری ہے رعشہ سا
کہیں بوڑھے تخیل کو جوانی کی ضرورت ہے