کیوں ترے ساتھ رہیں _ عمر بسر ہونے تک
ہم نہ دیکھیں گے عمارت کو کھنڈر ہونے تک

تم تو دروازہ کھلا دیکھ کے _ در آئے ہو
تم نے دیکھا نہیں دیوار کو در ہونے تک

چپ رہیں، آہ بھریں، چیخ اٹھیں یا مر جائیں
کیا کریں بے خبرو __ تم کو خبر ہونے تک

ہم پہ کر دھیان _ ارے چاند کو تکنے والے
چاند کے پاس تو مہلت ہے سحر ہونے تک

حال مت پوچھیے کچھ باتیں بتانے کی نہیں
بس دعا کیجیے _ دعاؤں میں اثر ہونے تک

سگ آوارہ کے مانند _ محبت کے فقیر
در بدر ہوتے رہے شہر بدر ہونے تک

دشت خاموش میں دم سادھے پڑا رہتا ہے
پاؤں کا پہلا نشاں ____ راہگزر ہونے تک

فانی ہونے سے نہ گھبرائیے فارسؔ کہ ہمیں
ان گنت مرتبہ مرنا ہے __ امر ہونے تک