تم کہاں جاؤ گے ؟ لوگ تو تھک کر گھر جاتے ہیں صرف ایک سوال نہیں، بلکہ ان لوگوں کے دل کی آواز ہے جو زندگی بھر دوسروں کے لیے جیتے ہیں مگر خود کہیں سکون نہیں پاتے۔ دن بھر کی مشقت ذمہ داریوں اور دکھوں کے بعد جب ہر شخص اپنے گھر لوٹتا ہے تو اس کے پاس ایک جگہ ہوتی ہے جہاں وہ اپنی تھکن اتار سکے، مگر کچھ لوگ ایسے بھی ہوتے ہیں جن کے پاس دیواریں تو ہوتی ہیں مگر گھر نہیں ہوتا، رشتے تو ہوتے ہیں مگر اپنائیت نہیں ہوتی، لوگ تو ہوتے ہیں مگر کوئی ایسا نہیں ہوتا جو ان کی خاموشی کو سمجھ سکے۔ ایسے لوگ رات کے اندھیروں میں اپنے دکھوں کے ساتھ جاگتے رہتے ہیں، اپنے زخموں کو خود سہلاتے ہیں اور اپنے آنسو خود پونچھتے ہیں۔ انہیں کسی منزل کی تلاش نہیں ہوتی، بس ایک ایسے احساس کی تلاش ہوتی ہے جہاں دل کو سکون مل جائے، جہاں کوئی ان سے یہ نہ پوچھے کہ وہ کیوں اداس ہیں بلکہ بغیر پوچھے ان کی اداسی سمجھ لے۔ زندگی کے ہجوم میں وہ مسلسل چلتے رہتے ہیں مگر اندر سے تھک چکے ہوتے ہیں، اور تب یہ سوال ان کے وجود میں گونجتا ہے کہ آخر وہ کہاں جائیں، کیونکہ لوگ تو تھک کر گھر چلے جاتے ہیں، مگر جن کے دل بے گھر ہو جائیں وہ کہاں پناہ ڈھونڈیں؟